Ek sawal

Ye jo bar bar khiche chale ate ho tum
Un ginti ki yaadon ke pas
Bina kisi mansube ke 
Aksar na jante hue bhi jab fir se rubaru ho jate ho 
Tum un ginti ki yaadon se
Kabhi socha hai aisa kyu karte ho tum?

Badi ajeeb si hai ye tumhari kuch aadatein 
Aksar Raton ko jab sab apne ghar ke andar so rahe hote hain 
Ek Anjani si talab si uthti hai tumhare andar 
Aur nikal padte ho tum us rat ke agosh me 
Akele, tanha se, tehlte hue 
Un galiyon me jaha par sangat ke lie hota hai chand
Aur ek sukoon se bhari hui thandi purvai
Aur hota hai sannata, isi ki talash me nikalte ho na tum?
Kabhi socha hai magar aisa kyu karte ho tum?

Aise to bada shauk hai tumhe 
Apne ghar ko sajane ka 
Kai nai si cheezein khareed ke late ho 
Kabhi sandali ki khusbhu wali agarbatti
To kabhi Buddha ke chehre wali wo peeli light 
Har ek nayi koshish us ek kone ko dhundhne ki
Jaha tumhara Dil Sambhal jae
Jise tum apna chota sa khud ka kona keh sako
Fir chahe waha gadda bichakar ya zameen par hi let jao
Aur kabhi man kare to waha pade hue kuch nagme gunguna lo
Dhundh to tum ek pal ke lie us dil me shanti rahe ho
Wo bachpan ki befikri us chupe hue kone me 
Yu to ghar bahut bada hai tumhara 
Par us kone ki talash aj bhi karte ho tum
Kabhi socha hai aisa kyu karte ho tum?

Kai nazm suni hai tumne in dino
Kaha tha sabne naye shabd padho
Nai dhun suno - shayad ek naya nazariya mil jae jeene ka 
Par fir bhi thak har ke un Chand nazmo pe hi to thahrti hai dil ki dhadhkan tumhari
Aj bhi wahi 5 shayari to padhte ho tum 
Khud se,
Kabhi rat ke andhere me to kabhi sham ke ujale me 
Aisa kya hai un shabdon me 
Jo itna pyar karte ho tum unse 
Aisi bhi kya wafadari chand shabdon se 
Aur aisi bhi kya bewafai baki ki nazmon se 
Shayad sun tum aj rahe ho
Shayad padh tum aj rahe ho
Lekin samajh aur mehsus wahi lamha kar raha hai jab tumne unhe likha tha 
Ya us waqt jab ladakpan me pehli bar unko samjha tha tumne 
Kabhi socha hai waise aisa kyu kar rahe ho tum?

~ Ashk

Comments

Popular posts from this blog

क्या समंदर भी कभी रोता होगा

जुरत कर बैठ.....

The Creaking Chair - Part XXI